Maalaarnissamut ilitsersuut

Kikkut maalaaruteqarsinnaappat:

Kikkulluunniit inatsisinut tunngatillugu soqutigisaqartut.
Unammilleqatigiinnermik Nakkutilliisoqarfik.
Suleqatigiiffiit pisortanilu oqartussaasut, Naalakkersuisunit maalaaruteqarnissamut Pisinnaatinneqartut.

Suliat suliarineqarnerminni 100.000 koruunit inorlugit naleqartut Neqerooruteqartitsisarnermut Maalaaruteqartarfimmit suliarineqarsinnaanngillat.

Kingusinnerpaamik maalaarutip Maalaaruteqartarfimmut tunniunneqarneranut peqatigitillugu maalaaruteqartup suliakkiisoq unioqqutitsinertut isigineqartoq pillugu allakkatigut ilisimatissavaa, aammalu maalaarutip Maalaaruteqartarfimmut tunniunneqarnera pillugu nalunaaruteqarfigissallugu.

Neqerooruteqartitsinerup inernera neqerooruteqartumut nalunaarutigineqarneraniit sapaatit akunnerisa sisamat qaangiunnerini maalaarut Maalaaruteqartarfimmut tunniunneqassaaq.

Kikkut maalaarutigineqarsinnaappat:

Neqerooruteqartarnermut inatsit malillugu neqerooruteqartitsinermi inatsimmi aalajangersakkanik, imaluunniit inatsit naapertorlugu maleruagassiaasimasunik unioqqutitsisoqarsimasoq isumaqaraanni maalaaruteqartoqarsinnaavoq.

Qanoq iliorluni maalaaruteqartoqassava:

Allakkatigut maalaarummik Neqerooruteqartitsisarnermut Maalaaruteqartarfimmut nassiussinikkut maalaaruteqartoqassaaq.
Maalaarut allakkatigut Neqerooruteqartitsisarnermut Maalaaruteqartarfik, Allattoqarfik, Postboks 909, 3900 Nuuk-mut imaluunniit mail-ikkut, box909@nanoq.gl-imut, imatut nalunaaqutserlugu: Neqerooruteqartitsisarnermut Maalaaruteqartarfik, Allattoqarfik, nassiunneqarsinnaavoq.

Akiliut

Maalaarummik nassiussinermi suliap suliarineqarnerata 1 %-ia akiliutitut akilerneqassaaq, taannali annerpaamik 100.000 koruuniussaaq. Maalaaruteqarnermut akiliut erngerluni akilerneqanngippat, Maalaaruteqartarfimmi siulittaasoq maalaaruteqarnermut akiliutip akilerneqarnissaanut piffissaliissaaq. Piffissaliussaq malinneqanngippat, maalaarut itigartinneqassaaq.

Piffissaq suliarinniffiusoq

Maalaaruteqartarfiup aalajangiineri sapinngisamik suliap Maalaaruteqartarfimmut suliakkiissutigineqarneraniit qaammatit pingasut qaangiunnerini naammassineqarsimasassapput.

Tamanut ammasumik saqqummiisarneq

Maalaaruteqartarfiup aalajangiineri pineqartut kinaassusii isertuullugit www.neqeroorut.gl aqqutigalugit tamanut ammasumik saqqummiunneqartassapput.

Oqaatsit

Pisariaqartillugu nutserisussanik atugassiisoqarsinnaavoq.